Mass Readings

Catholic Ireland

Liturgical Readings for : Thursday, 19th September, 2024
Readings in English
Next Sunday's Readings

CÉAD LÉACHT

Sliocht as an céad Litir Naomh Pól chuig naCoirintigh 15:1-11
Ba mhaith liom a mheabhrú anois daoibh, a bhráithre,
an dea-scéal úd a d’fhógair mé daoibh agus ar ghlac sibhse leis

A bhráithre, ba mhaith liom a mheabhrú anois daoibh, a bhráithre, an dea-scéal úd a d’fhógair mé daoibh agus ar ghlac sibhse leis agus a bhfuil sibh suite go daingean de. Is ann chomh maith atá bhur slánú le fáil má chloíonn sibh go dlúth leis an teagasc mar a thug mise daoibh é – ach mura in aisce a chreid sibh.

Thug mé daoibh mar chéad nithe an teagasc a bhí faighte agam féin: go bhfuair Críost bás in éiric ár bpeacaí, de réir na scrioptúr; gur adhlacadh é agus gur éirigh sé an tríú lá de réir na scrioptúr; gur thaispeáin sé é féin do Chéafas agus ina dhiaidh sin don dáréag; gur thaispeáin sé é féin do bhreis agus cúig céad de na bráithre in éineacht a bhfuil a bhformhór ar marthain go fóill cé go bhfuil cuid acu ar shlí na fírinne. Ansin thaispeáin sé é féin do Shéamas agus ina dhiaidh sin do na haspail go léir. Agus i ndeireadh na dála thaispeáin sé é féin domsa faoi mar gur dhuine mé a rugadh in antráth.

Mar is mise an duine is lú ar fad de na haspail – ní fiú mé go dtabharfaí aspal orm de bhrí go ndearna mé géarleanúint ar eaglais Dé. Ach le grásta Dé táim mar atáim agus ní díomhaoin a bhí a ghrásta i mo leith. Níorbh ea go deimhin mar is déine a shaothraigh mé ná aspal ar bith acu, siúd is nach mise faoi deara é ach grásta Dé a bhí ag obair liom. Ach is cuma idir mise agus iadsan, sin mar a fhógraímid agus sin mar a chreid sibhse.

Briathar an Tiarna Buíochas le Dia

Salm le freagra Sm 117
Freagra Tugaigí buíochas don Tiarna toisc gur maith é.
Malairt freagra Alleluia

1. Tugaigí buíochas don Tiarna toisc gur maith é; agus go maireann a bhuanghrá go brách.
Bíodh teaghlach Iosrael á rá: “Maireann a bhuanghrá go brách.”  Freagra

2. “D’oibrigh deaslámh an Tiarna go tréan; is i a dheaslámh a d’ardaigh mé.
Ní éagfaidh mé, mairfidh mé; agus inseoidh mé a mhóréachtaí.      Freagra

3. Is tú mo Dhia, gabhaim buíochas leat; móraim thú, a Dhia.
Gabhaim buíochas leat de bhrí gur éist tú liom; agus gur tú mo shlánaitheoir.           Freagra

SOISCÉAL

Go raibh an Tiarna libh. Agus le do spiorad féin
Sliocht as Soiscéal naofa de réir Naomh Lúcás 7:36-50 Glóir duit, a Thiarna.

Sliocht as an Soiscéal naofa de réir Naomh
Tá a mórchuid peacaí – maite di; is léir sin ó mhéid a grá.

San am sin thug duine de na Fairisínigh cuireadh dó chun proinne aige féin; agus ar dhul isteach dó i dteach an Fhairisínigh, chuaigh ina luí ag bord. Agus peacach mná a bhí sa chathair, nuair a fuair sí scéala é bheith ag bord i dteach an Fhairisínigh, thug sí léi próicín alabastair d’ola chumhra, agus ar bheith di ar gcúl ag a chosa agus í ag gol, thosaigh ag fliuchadh a chos lena deora, agus bhí á dtriomú le folt a cinn, agus í ag pógadh a chos agus á n-ungadh leis an ola chumhra.

An Fairisíneach a thug an cuireadh dó, ar a fheiceáil sin dó, dúirt ina aigne:
“Dá mba fáidh an duine seo, bheadh a fhios aige cé hí, agus cén sort í,
an bhean seo atá ag baint leis, gur peacach í.”
Dúirt Íosa leis á fhreagairt: “A Shíomóin, tá rud agam le rá leat.”
“A Mháistir,” ar seisean, “abair.”
Dúirt: “Bhí beirt i bhfiacha ag éilitheoir áirithe: bhí cúig céad déanar amuigh ar dhuine acu, agus caoga ar an duine eile. Nuair nach raibh an t-íoc acu, mhaith sé dóibh araon. Cé acu, mar sin, is mó grá dó?”
D’fhreagair Síomón agus dúirt: “An té, mo bharúil, is mó dár mhaith.”
Dúirt sé leis:
“Thug tú an bhreith cheart.”

Agus ag iompú chun na mná, dúirt sé le Síomón:
“An bhfeiceann tú an bhean seo?
Tháinig mé isteach i do theach; níor thug tú uisce chugam do mo chosa; ach do fhliuch sí seo mo chosa lena deora agus thriomaigh lena gruaig iad.
Níor thug tú dom póg; ach í seo, ó tháinig mé isteach, níor stad sí ach ag pógadh mo chos.
Níor ung tú mo cheann le hola; ach d’ung sí seo mo chosa le hola chumhra.

Sin é an fáth, deirim leat, a bhfuil a peacaí – a mórchuid peacaí – maite di; is léir sin ó mhéid a grá. Ach an té dá maítear an beagán, ní ghránn ach beagán.”
Agus dúirt sé léi: “Tá do pheacaí maite.”
Agus iad seo a bhí ag bord leis, thosaigh siad ag rá ina n-aigne:
“Cé hé seo a dhéanann fiú amháin peacaí a mhaitheamh?”
Ach dúirt sé leis an mbean:
“Shlánaigh do chreideamh tú. Imigh faoi shíocháin.”

Soiscéal an Tiarna. Moladh duit, a Chriost