Mass Readings
Liturgical Readings for : Sunday, 28th July, 2024Today's Readings
Readings in English
CÉAD LÉACHT
Sliocht as an dara Leabhar na Rithe 4:42-44
Íosfaidh siad agus beidh fuíoll fágtha acu.
Tháinig fear ó Bhál Seáiliseá agus thug leis chun giolla Dé arán a rinneadh de na céadtorthaí, fiche builín eorna agus arbhar úr [sa dias].
“Tabhair don phobal é le hithe,” arsa Eilíseá.
D’fhreagair a sheirbhíseach:
“Conas is féidir liom é seo a roinnt ar chéad duine?”
“Tabhair don phobal é le hithe,” ar seisean go daingean, “óir seo mar a deir an Tiarna:
‘Íosfaidh siad agus beidh fuíoll fágtha acu.’”
Roinn sé orthu é. D’ith siad agus bhí fuíoll fágtha acu, mar a dúirt an Tiarna.
Briathar an Tiarna Buíochas le Dia
Salm le Freagra Sm144
Freagra Osclaíonn tú do lámh a Thiarna agus sásaíonn tú sinn.
1. Ceiliúrfaidh d’oibreacha thú, a Thiarna,
agus beannóidh do dhaoine naofa thú.
Canfaidh siad glóir do ríochta,
agus foilseoidh siad do chumhacht. Freagra
2. Bíonn súile cách ag feitheamh ort,
agus tugann tú bia dóibh in am tráth.
Osclaíonn tú do lámh
is sásaíonn tú a bhfuil beo le do chinéaltas Freagra
3. Is fíréanta an Tiarna ina shlite uile
is is naofa é ina oibreacha go léir.
Is gairid an Tiarna dá ngaireann air, Freagra
DARA LÉACHT
Sliocht as Litir Naomh Pól chuig na hEifísigh 4:1-6
Aon chorp amháin, aon Tiarna amháin, aon chreideamh amháin agus aon bhaisteadh amháin.
A bhráithre, táim ag impí oraibh, dá bhrí sin, agus mé i mo ghéibheannach ag an Tiarna, bhur saol a thabhairt go cuí de réir na gairme atá faighte agaibh agus sibh a bheith lán d’uirísle, de láchas agus d’fhoighne.
Cuirigí suas go carthanach le chéile agus déanaigí bhur ndícheall chun an aontacht a thagann ón Spiorad a choimeád faoi cheangal na síochána. Aon chorp amháin agus aon Spiorad amháin atá ionaibh faoi mar nach bhfuil ach aon dóchas amháin agaibh ó fuair sibh bhur ngairm ó Dhia. Níl ann ach aon Tiarna amháin, aon chreideamh amháin agus aon bhaisteadh amháin. Níl ann ach aon Dia amháin atá ina Athair ag cách: é os cionn cách agus ag gníomhú i gcách agus istigh i gcách uile.
Briathar an Tiarna Buíochas le Dia.
Alleluia Véarsa Eo 6: 63, 68
Alleluia, alleluia!
Na focail atá ráite agat, a Thiarna, is spiorad agus is beatha iad.
Is agatsa atá briathra na beatha síoraí
Alleluia!
SOISCÉAL
Go raibh an Tiarna libh. Agus le do spiorad féin
Sliocht as an Soiscéal naofa de réir Naomh Marcas 6:1-15 Glóir duit, a Thiarna.
Roinn Íosa oiread agus ab áil leo ar na daoine agus iad ina suí.
San am sin d’imigh Íosa anonn thar farraige na Gailíle, is é sin, farraige Thibirias. Lean slua mór é mar chonaic siad na comharthaí a bhí sé a dhéanamh ar lucht tinnis. Ghabh Íosa an sliabh suas agus shuigh ansiúd in éineacht lena dheisceabail. Bhí féile na nGiúdach, an Cháisc, in achmaireacht.
Nuair a d’ardaigh Íosa a shúile, mar sin, agus nuair a chonaic go raibh slua mór ag teacht chuige, dúirt sé le Pilib:
“Cá gceannóimid arán chun go mbeadh bia acu seo?”
Ag baint trialach as a dúirt sé é sin, mar bhí a fhios aige féin cad a bhí sé chun a dhéanamh.
D’fhreagair Pilib é:
“Níor leor luach dhá chéad déanar d’arán chun go mbeadh greim an duine acu.”
Dúirt duine dá dheisceabail leis – ba é Aindrias é, deartháir Shíomóin Peadar:
“Tá ógánach anseo a bhfuil cúig builíní eorna aige, agus dhá iasc, ach cá rachadh an méid sin ar oiread daoine?”
Dúirt Íosa:
“Cuirigí na daoine ina suí” – bhí mórán féir san áit. Shuigh siad síos mar sin, timpeall cúig mhíle duine. Agus thóg Íosa na builíní, d’altaigh, agus roinn iad ar na daoine agus iad ina suí; agus mar an gcéanna oiread agus a b’áil leo de na héisc.
Nuair a bhí siad sách, dúirt sé lena dheisceabail:
“Bailígí an bruscar fuíligh chun nach rachadh aon ní amú.”
Bhailigh siad ansin lán dhá chiseán déag de bhruscar as na cúig builíní eorna, a d’fhág na daoine a fuair an béile. Nuair a chonaic na daoine, mar sin, cad é mar chomhartha a bhí déanta ag Íosa,
dúirt siad: “Is é seo go dearfa an fáidh atá le teacht ar an saol.”
Agus ó bhí a fhios ag Íosa go raibh ar aigne acu teacht á fhuadach chun rí a dhéanamh de,
chuaigh sé i leataobh arís faoin sliabh ina aonar.
Soiscéal an Tiarna. Moladh duit, a Chriost
************************************
Machtnamh ar Bhriathar Dé dia Domhnaigh
Arán agus éisg
Ag féachaint ar an slua ocrasach agus an gannchuid bia abhí ar fáil leo, bhí a fhios ag Íosa cérb ollmhór an dúslán abhí ós a chómair, iad go léir a bheathú. Ach níor aontaigh sé leis an easpa mhisnigh a mhothaigh na h’aspail. Chonaic sé gurbh fhéidir rud luachmhar a dhéanamh leis na cúig bullógaí eorna agus dhá iasc a chuir an buachaill beag ar fáil, chun an cúig mhíle duine a bheathú. Ní féidir linn a shamhlú go díreach cad a tharla an lá sin amach sa bhfásach ach is léir go raibh ról ríthábhachtach ag an buachaill beag lena chúig bollóg aráin eorna agus an cúpla éisc. Ann féin, ní raibh ag an mbuachaill ach go leor bia le haghaidh béile simplí dá theaghlach beag. Ach bhí an buachaill sásta a chuid eorna agus a chuid éisc a chur ar fáil le hÍosa. Ar bhealach aisteach, bhí Íosa in ann oibriú le bronntanas croiúil an bhuachaill óg chun gach duine a chothú. Thug fhlaithiúlacht aon duine amháin an t-oscailt a bhí ag teastáil. Trí bhronntanais bheaga agus toilteanacha, is féidir go dtharlóigh miorúiltí eile fós, inár linn agus inár mbeatha féin.
Pádraig Ó Rúairí, cp,
Sliabh Argus, Átha Cliath.
********************************************
AN BÍOBLA NAOFA
© An Sagart