Mass Readings

Catholic Ireland

CÉAD LÉACHT

Sliocht as an  Leabhar Gníomhartha na nAspal              28:16-20. 30-31
D’fhan sé ar feadh lán dhá bhliain agus lean sé air ag fógairt ríocht Dé.

Nuair a thángamar chun na Róimhe fuair Pól cead fanacht ina lóistín féin le saighdiúir á choimeád.
Trí lá ina dhiaidh sin ghlaoigh sé chuige cinn urra na nGiúdach agus nuair a bhí siad cruinnithe labhair sé leo:
“A bhráithre,” ar seisean, “cé nach ndearna mé aon ní in aghaidh ár gcine ná in aghaidh béasa ár sinsear, cuireadh i ngéibheann mé in Iarúsailéim agus tugadh suas do na Rómhánaigh mé. Scrúdaigh siadsan mé agus nuair nach raibh aon chúis orm a thuillfeadh an bás, bheartaigh siad mé a scaoileadh saor. Ach chuir na Giúdaigh ina gcoinne agus b’éigean domsa Céasar a ghairm, agus ní hé go raibh aon ní agam le cur I leith mo chine féin. Is é fáth gur iarr mé sibhse a fheiceáil agus labhairt libh de bhrí gur mar gheall ar dhóchas Iosrael atá an slabhra seo ormsa.”

D’fhan sé ar feadh lán dhá bhliain sa lóistín a bhí ar cíos aige, agus gach ar tháinig ag triall air chuir sé fáilte rompu.Lean sé air ag fógairt ríocht Dé agus scéal an Tiarna Íosa Críost aige á theagasc go lánoscailte agus gan bac ar bith air.

Briathar an Tiarna          Buíochas le Dia

Salm le freagra           Sm 10
Freagra                           Feicfidh na fíréin d’aghaidh, a Thiarna.  
Malairt le freagra      Alleluia!

1. Tá an Tiarna ina theampall naofa,ar neamh atá a chathaoir ríoga.
Breathnaíonn a shúile [na hísle]; tástálann siad clann na ndaoine.                          Freagra 

2. Féachann an Tiarna an fíréan is an t-ainfhíréan,
is fuath leis fear an fhoréigin.                                                                                            Freagra 

3. Is geal leis an Tiarna an fhíréantacht: agus feicfidh na fíréin a aghaidh.            Freagra

SOISCÉAL

Go raibh an Tiarna libh.              Agus le do spiorad féin
Sliocht as an Soiscéal naofa de réir Naomh Eoin    16:23-28         Glóir duit, a Thiarna.
Sin é an deisceabal a thugann fianaise i dtaobh na nithe sin, agus a scríobh na nithe sin agus tá a fhios againn gur fíor í a fhianaise.

San am sin d’iompaigh Peadar agus chonaic sé á leanuint an deisceabal ar thug Íosa grá dó, an té a luigh ar a ucht ag an suipéar agus a dúirt:
“A Thiarna, cé atá chun tú a bhrath?”
Nuair a chonaic Peadar é sin dá bhrí sin, dúirt sé le Íosa: “Cad mar gheall air seo?”
Dúirt Íosa leis:
“Más mian liom é a fhanacht go dtaga mé, cad é sin duitse? Lean-sa mise.” Bhí sé ina scéal reatha dá bhrí sin i measc na mbráithre nach bhfaigheadh an deisceabal sin bás. Ach níor dhúirt Íosa leis: “Ní bhfaighidh sé bás”; ach: “Más mian liom é a fhanacht go dtaga mé, cad é sin duitse?”

Sin é an deisceabal a thugann fianaise i dtaobh na nithe sin, agus a scríobh na nithe sin agus tá a fhios againn gur fíor í a fhianaise. Tá a lán nithe eile a rinne Íosa agus dá scríofaí iad ina gceann is ina gceann, ní bheadh, dar liom, slí ar domhan féin do na leabhair a bheadh á scríobh.

Soiscéal an Tiarna.            Moladh duit, a Chriost

AN BÍOBLA NAOFA
© An Sagart