Mass Readings

Catholic Ireland

CÉAD LÉACHT

Sliocht as an céad Litir Naomh Pól chuig na Galataigh       5:1-6
Is cuma an timpeall ghearradh ann nó as, ach an creideamh a oibríonn trí ghrá.

D’fhonn is go mbeimis saor is ea a d’fhuascail Críost sinn. Seasaigí go daingean dá bhrí sin agus ná cuirtear sibh faoi chuing na daoirse athuair. Seo mise Pól á rá libh nach ndéanfaidh Críost aon mhaitheas daoibh má dhéantar timpeallghearradh oraibh. Dearbhaím arís don uile dhuine a ndéantar timpeallghearradh air, go bhfuil sé de dhualgas air an dlí a choimeád ina iomláine.

Agus sibhse a bhíonn ag lorg na fíréantachta sa dlí tá sibh dealaithe ó Chríost agus tá gnaoi Dé caillte agaibh. Is ón gcreideamh, áfach, atáimidne ag súil leis an bhfíréantacht a fháil faoi luí an Spioraid. Mar in Íosa Críost is cuma an timpeall ghearradh ann nó as, ach an creideamh a oibríonn trí ghrá.

Briathar an Tiarna          Buíochas le Dia

Salm le freagra           Sm 118
Freagra                         Go dtaga do bhuanghrá orm, a Thiarna

1. Go dtaga do bhuanghrá orm, a Thiarna, agus do chabhair de réir do ghealltanais.
Tabharfaidh mé freagra ar lucht mo cháinte; toisc gur muinín liom do bhriathar.                    Freagra

2. Coimeádfaidh mé do dhlí de shíor, go brách na breithe.
Siúlfaidh mé i slí na saoirse, mar táim ar lorg do theagaisc.                                                            Freagra

3. Is i d’aitheanta a bheidh mo thaitneamh ós dóibh a thugaim grá.
Agus tógfaidh mé mo lámha chun d’aitheanta; déanfaidh mé machnamh ar do reachtanna.  Freagra

SOISCÉAL
Go raibh an Tiarna libh.                    Agus le do spiorad féin
Sliocht as an Soiscéal naofa de réir Naomh Lúcás         11:37-41        Glóir duit, a Thiarna.
Ach tugaigí uaibh ina dhéirc an ní atá agaibh, agus tá gach aon ní glan daoibh feasta.

San am sin thug Fairisíneach cuireadh d’ Íosa chun a mheán lae ina theach. Chuaigh sé isteach agus lig faoi ag bord. Ar a fheiceáil sin don Fhairisíneach, b’ionadh leis nach ndearna sé an t-ionladh ar dtús roimh an bproinn. Ach dúirt an Tiarna leis:
“Sea, is Fairisínigh sibh féin:
glanann sibh an taobh amuigh den chupa agus den mhias, ach tá an taobh istigh díbh lán de shlad agus de mhallaitheacht. A dhaoine gan chiall, nach é an Té a rinne an taobh amuigh a rinne an taobh istigh freisin?
Ach tugaigí uaibh ina dhéirc an ní atá agaibh, agus tá gach aon ní glan daoibh feasta.

Soiscéal an Tiarna.             Moladh duit, a Chriost

AN BÍOBLA NAOFA
© An Sagart